Müşârün-ileyh bir müddetden berü câh-ı defterî ve hizmet-i riyâsetde istikrâr ve zâtında infikâkı gayr-i mutasavver olan mehâil ve me'âsir ve rüşd ü sadâkati ahsen vecihle izhâr edüp istimrâr-ı baht-ı hemvâr ve tetâbuʿ-ı mûcibât-ı ikbâl-i rûzgâr ile her bâr mesânid-i ülyâda zânû-zede-i kadr ü iʿtibâr ve nesk-i sâzende-i umûr-ı kibâr u sıgār olmak bir şahsa gayr-i müyesser ve bir hâle intikāl lâzım-ı mâhiyyet-i beşer ve bâ-husûs vazʿ u refʿ ve hatt u tenzîl muktezâ-yı tabiʿat-i kader olduğuna binâen işbu Rebîʿül-evvelin onbirinci cumʿa günü müşârün-ileyh câh-ı siyâsetden maʿzûl ve hânesinde mükerremen ikâmet ile duʿâ-yı devâm-ı ömr-i devlet-i pâdişâhîye meşgûl oldu. Hizmet-i menîʿa-i riyâset mukaddemâ bir defʿa dahi zât-ı bergüzîde-sıfatlarıyla kesb-i zîb ü ziynet edüp vâkıf-ı umûr-ı düvel ve ârif-i (242-a) ahvâl-i milel mecmûʿa-i ilm ü kemâl yektâ-güher-i maʿârif ü efdâl müteheccid ü zâhid müteverriʿ ü âbid kutb-ı dâire-i istikāmet medâr merkez-i iʿtimâd ve emniyyet nuhbe-i ricâl-i bâ-kemâl zübde-i hayr-hâhân-ı devlet-i ebed-ittisâl gayret-keş-i dîn-i mübîn pîr ü selef-i sâlihîn olan Esseyyid Mehmed Hayri Efendi hazretlerine tefvîz buyurulup münhal olan Tersâne-i âmire emâneti dahi Abdullah Bey-efendi'ye yevm-i mezkûrda tevcîh olundu.