Bundan akdem Bosna eyâleti tevcîh olunan Vezîr İsmâîl Paşa mansıbına dâhil olmazdan mukaddem mat'ûnen vefât haberi şehr-i mezkûrun on sekizinci isneyn gecesi der-i devlet-medâra vâsıl olup mahlûl olan Bosna eyâleti hâlâ İnebahtı muhâfızı olan Vezîr Moralı Ahmed Paşa'ya ve İnebahtı Karaman vâlisi Vezîr Defterdâr El-hâc Mustafa Paşa'ya ve Karaman eyâleti Musul vâlisi Vezîr Timur Paşa'ya ve Musul eyâleti Bağdâd vâlisinin arz u niyâzı üzere mukaddemâ mîrimîrânlık verilen Abdülbâkî Paşa'ya tevcîh ve i'tâ ve iki gün mukaddem Rumeli vâlisi Abdi Paşa'nın dahi mansıbı ibkā olundu. Tercüme: Vezîr-i müşârün-ileyh ehl-i hırfetden bir şahsın oğlu olup bin yüz elliiki târîhinde Âsitâne-i saʿâdet'de mütevellid ve taklîb-i sahâif-i düreng-i subh u mesâ ile derece-i şebâba mütesâid oldukda (216-b) Galata Sarayı'na çerâğ ve baʿzı maʿârif tahsîli ile âteş-endâz-ı hırmen-i batālet ve ferâğ olup kesb etdiği kemâlâtın semeresini müşâhedeye dehrin müsâʿadesi bedîdâr ve zerrîn-sivâr-ı sâʿad-i ikbâli olan hutûtun birkaç nevʿini baʿzı maʿârif-perver zevât hüdâvendigâr-ı sâbık merhûma arz u irâet ile hakkında emtâr-ı mülûkâneyi hâstekâr olduklarında derhâl Saray-ı cedîd'de vâkiʿ hazîne hüddâmmına ilhâk olunup çok geçmeden bahtiyâr ve saʿâdet-i tāliʿi kendüye kafadâr olarak sadr-ı esbak Silâhdâr Mehmed Paşa'ya kesb-i taʿalluk ve intisâb ve bir zaman duhânî ve haftânî hizmetleriyle kâmyâb ve tenhâlarda baʿzı umûr-ı muʿazzama istişâresiyle re'y ü tedbîrini istisvâb edüp bu vechile hâsıl olan kurbiyetini birâderlerini adem-i tahammül ile dâireden vücûdunu istiskāl ve defi bâbında tertîb-i envâʿ-ı merk ü âl eyledikleri esnâda ser-kitâbetî yamaklığı mahlûl olup bir müddetden sonra müşârün-ileyhin iʿânet ve imdâdiyle ser-kitâbetini ihrâz etmişidi. Zâtında mevdûʿ olan rüşd ü reviyyet ve fıtretinden merkûz olan cevdet-i karîha ve seciyyet muktezâsınca gûn-be-gûn derece-i iʿtibârı müzdâd ve mazhariyyet-i enzâr-ı mülûkâne ile hazîne kethüdâlığı rütbe-i vâlâsına isʿâd buyurulup mâhiyyet ve istiʿdâdı müteveffâ Halîl Paşa'nın maʿlûmu olduğuna binâen Enderûn-ı hümâyûndan ihrâcını semîr-i zamîr (217-a) ve baʿzı mukaddemât ile hakkında kârger olan nazar-ı mülûkâneyi ve şeref-i kurbiyyet ve ittisâlden müşârün-ileyhi tecnîb ve tebʿîd edüp mansıbı olan İnebahtı'ya vâsıl olmazdan mukaddem me'mûriyyetini tecdîd ve bi'l-iktizâ Sofya serliğini tevcîh ve bir müddetden sonra azl ve İsmâʿîl seraskerliğine vasl etdikden sonra sadr-ı müşârün-ileyhin zevâl ve izmihlâli vukūʿ ve hakkında câygîr olan gezend ü zararı medfûʿ olup o esnâda Bosna eyâletine nâil ve kürsî-i memleketine vâsıl olmazdan mukaddem minvâl-i muharrer üzere ke's-i himâmı mütenâvil oldu. Müşârün-ileyh ihtirâʿ-ı âlât-ı harbiyyede mâhir ve görüp işitdiği sanâyiʿi icrâda misli nâdir hezâr-fen etvârı müstahsen dânâ-yı şân-ı vezâret ve ârif-i kavânîn-i saltanat bir vezîr-i rûşen-zamîr idi. Füshat-i ecel ve vüsʿat-i ömr-i müstelzimü'l-emel ile bir zaman taşrada geşt ü güzâr ve ahvâl ve etvâr-ı halkı bi'n-nefs tecrübe ve ihtiyâr etse idi Devlet-i aliyye'nin katı çok işine yarayacağı zâhir idi.