İşbu şehr-i Ramazânü'l-mübârekin onüçüncü Çarşamba günü sulb-i pâkîze-i hazret-i şehriyârîden lâyık-ı tâc u taht bir şehzâde-i civân-baht zuhûr edüp taraf-ı hümâyûndan ism-i sâmîsi Sultân Mahmûd ünvâniyle tesmiye ve gülbin-i şöhretleri Adlî mahlası ile tenmiye buyurulup mu'tâd üzere top şenliği ve sâir levâzım-ı sürûr ve şâdmânî icrâ olundukdan sonra üç gece ale't-tevâlî deryâ donanması dahi tenbîh olunmağla cebeci-başı ve Topcu-başı ve tersâne emîni taraflarından ihtimâm ve bir kaç gün zarfında zikr olunan donanma itmâm olunup işbu Şevvâlü'l-mükerremin yirminci Perşembe gecesi tertîb-i mezkûr üzere her sınıf san'at-ı âteş-bâzların icrâ ve temâşâ kasdiyle müctemi' olan nâsın kesretinden rû-yi deryâ mânend-i basît-i gabrâ olup bu sûr-ı müstevcibi'l-hubûrdan aʻlâ ve ednâ nâil-i aksâ'l-gāye meserret ve hass u amm vâsıl-ı ser-menzil-i ferhat oldukları hâlde devâm-ı ömr-i devlet-i pâdişâhî (216-a) ve zuhûr ve bakā-i zerârî-i şehinşâhî da'vâtına muvâzib oldular. Vilâdet-i pür-beşâret-i hümâyûnlarına bu çâkerlerinin söylediği târîhdir: Nazm: Târîh dedi vak'anüvis-i devleti cevherle târîhin / Ne ziynetli bu Adlî mahlası Sultân Mahmûd'a. Nesren: «Hakk-ı Ramazan» lafzeyn-i mübârekeyni dahi târîh-i vâki' ve nice menâfi'-i hayriye-i kesîreyi câmi' olduğu bî-iştibâhdır.