Bahr-i siyâh boğazının iktizâ-yı vakt ü hâle göre muhâfazası ehemm-i umûrdan olduğuna binâen dâhil ve hâricinde vâkiʿ olan kılâʿ-ı atîka ve cedîdenin taʿmîr ve termîmi ve iktizâ eden neferâtının tertîb ve tetmîmi esbâbına bu esnâda teşebbüs olunup mukaddemâ müstahfız nâmıyla taʿyîn olunan şâhinci ve çakırcı neferâtının emr-i muhâresede kemâ-yenbağî iktidârları olmadığı lede't-tecrübe maʿlûm olduğundan cümlesi ihrâc ve hidemât-ı sâbıkalarına ircâʿ ve iʿâde ve merkūmlara câ-nişîn olmak üzere kâr-güzâr-ı neferâtın tertîbi irâde olunmağla hâlâ deryâ kapudanı vezîr-i mükerrem Gazi Hasan Paşa tarafından mukaddemâ takdîm olunan defter mûcibince hâric-i boğazda Anadolu cânibinde vâkiʿ Fener ve Revancık kalʿalarıyla Rumeli boğazında vâkiʿ cedîd Fener kalʿalarına yüzyirmibeşer akçe ile bir nefer dizdâr ve seksener akçe ile birer nefer kalʿa kethüdâsı ve seksener akçe ile birer nefer topcu başı ve altmışar akçe ile birer nefer cebe-hâneci ve ellişer akçe ile otuz (158-a) yedişer müstahfız ve otuzdörder topcu neferâtı ve diğer Rumeli boğazında vâkiʿ Garibce kalʿasıyla Anadolu cânibinde boğaz dâhilinde Poyraz limânı kalʿalarına dahi yüz yirmişer akçe ile birer nefer dizdâr ve seksener akçe ile birer nefer kethüdâ ve birer nefer topcu-başı ve altmışar akçe ile birer nefer cebe-hâneci ve ellişer akçe ile otuzyedişer müstahfız ve otuzdörder topcu neferâtı tertîb olunup Rumeli ve Anadolu kavakları kalʿaları bostaniyân ocağından ustalık olup neferâtı dahi bostanî olmak ve el-yevm mevcûd ve mukayyed olan neferâtın melhûz olan mikdâra iblâğ ve yevmiyyelerinin ağalarına tedârük etdirilmesi ve ibtidâları yedlerine tes- lîm ve her üç ayda bir defʿa müstahikk oldukları ulûfeleri Hazîne-i âmireden kabzına me'mûra iʿtâ ile mahalline îsâl ve zabitleri maʿrifetleriyle tevzîʿ ve taksîm ve târîk-i hizmet olanların esâmeleri refʿiyle iktifâ olunmamak ve tertîb olunan müstahfızân ve topcuyân darb ü harbe kādir tevânâ ve bahâdır olup leyl ü hızmet-i muhârazada cân-sipâr ve kalʿalarda dâimâ pâ-ber-câ-yi merkez-i istikrâr olmak ve müstahfızândan her gece dörder müstahfız münâvebe tarîkiyle nevbet-hânelere taʿyîn ve nısfü'l-leyle dek ikisi ve nısfü'l-leylden sabâha dek ikisi beklemek üzere zabitleri tarafından tenbîh ve telkīn olunup ecânib tarafından sefâine müteʿallik sevâd ve alâmet zâhir olduğundan cümleden evvel Rumeli feneri kalʿası tarafından meşhûd olacağı zâhir olmağla der-akab kalʿa-i mezbûre yeniçerileri ihbâr içün barut kaldurup hevâyî fişek atup ve bu işâretden hâric-i boğazda olan (158-b) Revancık kalʿasının dizdâr ve müstahfızları müteyakkız ve müteheyyi bulunmak ve sâ'ir kılâʿ müstahfızları alâim-i mezkûre vukūʿunda yekdiğere işâretler ile iʿlâm-ı keyfiyyet etmek ve Rumeli ve Anadolu kavağı kalʿalarında olanlar fitil derdest hâzır ve müterakkıb olup o makūle sefâin mürûr murâd eyledikleri hâlde ancak kalʿateyn-i mezkûreteynden top atılup menʿine takayyüd ve ısrâr ve taʿannüd zuhûrunda top dânelerini yağdırup gark-ı sefâin îcâbına ihtimâm ve gayret etmek ve eğer mürûr murâd etmeyüp Karataş altında tevakkuf ederler ise gaflet olunmayup kezâlik fitil-i derdest hâzır bulunup müstahfızân makūleleri «biz müstahfızız top umûruna karışmazız» demeyüp lede'l-iktizâ topculara iʿânet ve ittihâd-ı derûn ile topları iʿmâle sarf-ı miknet etmeleri meşrût ve müstahfızların hidemâtı topcu neferâtı hizmetleri misillû olmak lâzım geldiğinden iki fırkanın dahi yevmiyyelerinde tesâvî ihtiyâr olunduğu ve bu şurût-ı merʿiyyenin îfâ ve icrâsı ve esbâb-ı nizâmının istikrâr ve ibkāsı deryâ kapudanlarına tefvîz ve ihâle ve her onbeş günde bir defʿa bi'n-nefs kalʿalara varup yoklamak ve deryâ kapudanları hâzır olmadıkları mevsim-i sayfda vekilleri bulunan Tersâne-i âmire emînleri vech-i meşrûh üzere hareket ve Tersâne-i âmire'de zikr olunan şurût bir mahalde mukayyed ve mazbût olup lede'l-hâce mürâcaʿat ve ahkâmı düstûrü'l-amel olmak ve nizâm-ı mezkûrun bakāsı ve boğazların muhâfazası vezîr-i müşârün-ileyh tarafından taʿahhüd olunduğuna binâen kapu-kethüdâsı olan Dergâh-ı âlî kapucu-başılarından Yusuf Ağa dahi husûsât-ı mezkûreye takayyüd ve ihtimâm edüp kapucular kethüdâsı olan Mustafa Ağa'nın dahi bâ-emr-i âlî me'mûriyyeti hasebiyle tanzîm-i neferât (159-a) ve tekmîl-i levâzımât emrinde bezl-i cellî iktidâr etmek bâbında vezîr-i müşârün-ileyhe hitâben bâlâsı hatt-ı hümâyûn-ı şevket-makrûn ile müveşşah ve müzeyyen katʿiyyü'l-medlûl ve mufassal ve meşrûh bir kıtʿa emr-i celîlü'ş-şân şeref- yâfte-i sudûr ve esbâb-ı âdiyeden ma'dûd olan işbu tedbîr-i dil-pezîrin îkāʿiyle sedd-i suğür ve tahsîl-i emniyyet ve âsâyişe saʿy-i mevfûr kılındı.