Elçi-i mesfûr bi'l-vâsıta ifâde-i merâm meysûr olmadığını inbâ ve tâlib-i mükâleme olduğunu inhâ edüp lede'l-istîzân ruhsat-ı mülâkāta nâil ve işbu Muharremü'l-harâmın onbirinci perşembe günü reisülküttâb efendinin hânesine vârid ü vâsıl olup Malta korsanlariyle Devlet-i aliyye mütâreke murâd eylediği hâlde vâsıtalariyle nizâmı kābil ve bu mukābelede kendülerinin dahi Cezâyirlü ile mâ-beynleri bulunup husûl-i emniyyet-i tarafeyn ile defʿ-i gavâil olunmasını işʿâr ve İspanyalu ile vukūʿ bulan musâlaha iktizâsiyle husamâsına iʿânet münâfî-i şurût-ı safvet iken Cezâyirlü'ye alenen imdâd ve mukaddemâ İspanya'dan vürûd eden barutun bahâsı verilmeyüp ticâret sevdâsiyle getürdükleri metâʿa rağbet olunmadığını îrâd ve Cezâyirlü ile vukūʿ bulan muhârebede ahz eyledikleri üserâ-yi islâmiyye taraflarından elbise ile takdîm olunup Tersâne-i âmire'de olan İspanya esirleri bulunduk- ları hey'et üzere verildiklerini beyân ile taʿdâd-ı mevâdd etdikden sonra bir kıt'a takrîr dahi arz eyledi. Reisülküttâb efendi tarafından mukābele olunup Maltalu korsan makūlesinden ve deryâ sâriklerinden olup Devlet-i aliyye'nin bu bâbda muhâdene sûretine meyl ü rağbeti şânına şâyân olmadığı ve Devlet-i aliyye ber-mûceb-i şurût Cezayirlü'ye harb ü silm beyninde muhtâr ve lâzım gelen emr-i celîlü'ş-şânı ısdâr eylediğinden gayri teshîl-i madde zımnında saʿy ü himmeti bî-dirîğ ve iʿânet iddiâ olunan levâzımı (152-b) akçeleriyle iştirâ ve bu muʿâmele beyne'd-düvel tesvîğ oluna-geldiği zâhir olup ancak Cezayirlü ile İspanyalu'nun miyânelerinde tekevvün eden temâdî muhârebât müstelzim-i âfât ve mûcib-i tezelzül bünyân-ı masâfât olacağı ve levâzım-ı seferiyyeden olan barutun lüzûmu vakt-i cihâdda olup istiʿmâle salâhiyeti dahi ehemm olmağla bu defʿa vürûd eden barut tecrübe olundukda hassa-ı lâzımesi olan ihtirâkden sâlim ve işʿâliyçün iʿdâd olunnan âteş-i cevvâleyi hîn-i mukarenetde itfâ eylediği maʿlûm-ı evâlim olduğu Devlet-i aliyye'ye İspanyalu tarafından vürûd eden barut İngiliz barutu gibi olduğu takdîrde iştirâ ve bahâsı der-akab iʿtâ olunacağı ve iksâ-yı üserâ kānûn-ı devlet-i ebed-müddetden hâric olup her devlet kavâid-i merʿiyyesini muhâfazaya mükibb ve musırr olduğu ecvibeleri verilüp bu mazmûnda efendi-i müşârün-ileyh tarafından elçi-i mesfûre bir kıtʿa takrîr dahi iʿtâ olundu.