Zikri âtî menâsıb-ı ilmiyyenin vakt-i tevcîhleri hulûl eylediğine binâen işbu mâh-ı Muharrem'in altıncı sebt günü Mekke-i mükerreme kazâsı iki yüz Muharrem'i gurresinden zabt edüp yevm-i nasbdan azli muʿteber olmak şartiyle sâbıkā Edirne kadısı Mehmed Paşa imâmı Esseyyid Ali Efendi'ye ve Medine-i münevvere kazâsı ber-minvâl-i muharrer sâbıkā Mısır kadısı Sarı Mehmed Paşa-zâde İbrahim Beyefendi'ye ve Bursa kazâsı doksandokuz Cumâdel-ulâsı gurresinden zabt etmek üzere sâbıkā Kuds-i şerîf kadısı Bekir Paşa-zâde Ömer Beyefendi'ye ve Şam kazâsı târîh-i mezbûrdan zabt şartiyle sâbıkā Yenişehr-i Fener kazâsı imâm Bekir Efendi-zâde Mehmed Emin Efendi'ye tevcîh olundu.