Sebte boğazının hâric ve dâhilinde ba'zı muhâlifîn merâkib ve sefâin tehyi'e ve tevfîr ve Bahr-i sefîd cânibine tesyîr ve alâ-rivâyetin bazı cezâir ve sevâhil-i islâmiyyeye ve bâ-husûs Cezâyir ocağı tarafına sû-ı kasd niyyet-i fâsidesinde olduklarını teşhîr misillû evzâ'ları mesmû' olduğundan gayri müddet-i vâfireden berü Donanma-yı hümâyûn'un zehâb u iyâbı hemen adalar arası ve menâfi' husûlü mümkin olan mahallere münhasır olup Mora ve Girid verâlarında devr ü güzâr olunarak zümre-i muhâlifîne irâet-i şevket-i devlet mülâhazasiyle sene-i sâlife baharında masârif-i kesîre ve mühimmât-ı vefîre ile techîz ve tertîb ve kapudan paşa hazretleri ma'iyyetleriyle tesrîb olunan Donanma-yı hümâyûn birkaç gün mukaddem avdet etmiş bulunduğuna binâen işbu sene-i cedîde Muharreminin gurre-i garrası olan pazarertesi günü müşârünileyh hazretleri Yalı köşkü pîş-gâhında âlây gösterüp top şenliği eyledikden sonra (151-b) ber-mu'tâd-ı kadîm huzûr-ı şehriyâr-ı heft-iklîmde ilbâs-ı semmûr ile hâiz-i rehîne-i iftihâr ve ma'iyyetinde olan kapudânân ve sâir ricâl-i Tersâne-i âmire kezâlik iktisâ-yı hıla'-ı fâhire ile nâil-i bülga-i mesâr ve istibşâr oldular.