Bir müddetten (86b) berü şeyhülislâm ve müftilenâm olan Esad Efendi'nin ekser-i evkātı ilel ve emrâz ile güzerân ve bi'z-zarûre umûr-ı fetvâ muhtel ve perîşân olup birkaç defʿa mesnedinden tenzîl olunmak niyâzını tekrîr ve tarafına der-kâr olan hüsn-i zann-ı şâhâne husûl-i matlabını peyveste-i mevkiʿ-i tehîr edüp bu esnâda niyâz-ı mükerrerine müsâʿade ve dilediği mahalde ikāmeti ifâde olundu. Rumeli sadâretine mükerreren şeref-bahş olan Esad Efendizâde Şerîf Efendi ser-âmed-i ulemâ ve fazl u kemâlde bî-hemtâ, edebiyatta bedîʿ-i Hemedânî ve fünûn-ı sâirede muʿallim-i sânî, vâkıf-ı mezâyâ-yi umûr-ı devlet, müşkil-şâ-yi muʿzilât-ı saltanat olduğu mekşûf-i zamîr şehriyâr-ı pâk-tıynet olduğuna binâen işbu Cumâdelâhire'nin yirmibeşinci günü huzûr-ı hümâyûna daʿvet ve dûş-i istihkākına ferve-i beyzâ ilbâsiyle dest-nevâzende-i hürmet kılındı. Münhal olan Rumeli sadâreti Dürrîzâde Atâullah Efendi'ye ihsân ve câh-ı mezkûr ümidinde olan Mollacıkzâde İshak Efendi'ye Rumeli pâyesi iʿtâsiyle cebr-i noksân olundu.