Müşârünileyhin eyyâm-ı ikbâlinde kethüdâsı ve ahz-i berâtil ve rüşâda saht u gazab hakkı nâsî olan Hüseyin Efendi cihet-i ma'lûme ile lisâna gelüp musâderesiyle (67a) iktifâ menvî havâtır şüfeʿâ iken gâh malını ihfâ ve gâh evliyâ-yi umûru zebân-zed-i cevr ü ezâ eyleyüp, erbâb-ı nasîhatin pend-i sûd-mendini tahkîr كالباحث عن حتفه بظلفه mefhûmu üzere sinân-ı lisân-ı taʿrîz ile o makūleleri dil-rîş-i tekdîr edüp zâtında dahi bir şahsın ikbâli idbâra intikāl ettikte bed-gûları tekâsür ve mesâvisi tevâtür derecesinde elsine-i âşinâ ve bî-gâneden tebâdür edüp bu ahvâl semʿ-i eşref-i şehen-şâhiye vâsıl oldukta mahdûmu zamânında ağraz ile meşûb olan umûr ve ahkâm merkūma isnâd olunarak mahbes-i teng-nây-i bûstâniyânda izʿâc ve îlâm ve nakd ü cins neye mâlik ise istiʿlâm ve tahkîk akabinde vâsıta-i habl-i mâr-endâm ile hank u iʿdâm olundu. Mûmâileyh sâye-i devlette sipâh kitâbeti râddesini iğtinâm ve vâfir nukūd ve îrâd ile kesb-i sermâye-i izz ü ihtişâm edüp kâr-sâzân-ı vakt vesâtetleriyle mevcûdunu fedâ ve yalnız îrâdiyle iktifâ etse idi, zâhir-i hâle nazaran seyf-i siyâsetten reh-yâb-ı necât olacağını o vaktin mukarribleri "baʿzı mevsûkü'l-kelim kimselere ismâʿ ve fevt-i fursat etti" deyü etbâk ü icmâʿ ettiler ise dahi merkūmun peymâne-i ikbâli mâlâ-mâl ve eceli dahi bu yüzden olduğuna binâen istîfâ-yi eyyâm-ı ömr ile mütevârî-i zîr-perde-i fenâ ve zevâl oldu.