Medîne-i Münevvere lâ-zâlet bi-envâri'l-ilâhiyye-i müsevverede mütemeddin ve mutavattın ve mücâveret ile mütemekkin olan ağniyâ ve fukarâ ve akviyâ ve zuʿafânın kemâl-i emniyet ve râhatları nukāve-efkâr-ı şehriyâr-ı pâk-tıynet olup, ancak bir müddetten berü belde-i mezkûrede baʿzı eşhâs peydâ ve celb-i hutâm-ı dünyâ hâtıralarıyla kesb-i teferrüd ve istiʿlâ sadedinde olup rûz u şeb biri biriyle gavga ve sükkân-ı tayyibe-i tayyibeyi teşvîş-i hâtıra mübtelâ eylediklerinden fazla Harem-i Muhterem-i Nebevî'ye ba'zen tüfeng dânesi isâbet ve bu takrîb hetk-i perde-i hürmet eyledikleri sâmi'a-res-i veliyy-i devlet olup zikr olunan şûriş ü ihtilâli izâle ve tathîr ve Medîne-i Münevvere'de ikāmet ile hilâf-ı şer ve kānûn harekete tasaddî edenleri kahr u tedmîr etmek bâbında, bir vezîr-i dilîrin ol savb-ı eşrefe taʿyîni istisvâb ve Haleb vâlisi İzzet Ahmed Paşa bu emr-i ehemmi temşiyete intihâb olunup, fıkdân-ı kuvvet ile giriftâr-ı kayd-ı ıztırâb olmaması zımnında Mısır tarafından vâfir zahâir taʿyîn ve yüz elli kise Şam etrâfında olan mîrîden ihâle ile suʿûbet-i me'mûriyeti teshîl ve tehvîn olunduğundan başka Aydın muhassıllığı tarafına tevcîh ve hâsılâtı mütesellimi tarafından îsâl olunmak sûretiyle dahi terfîh olunmuşidi. Müşârünileyh Şam'a vardıkta havâle olunan malı tahsîlde âciz (66b) olup Şam vâlisi dahi hüccâcı alıp gitmiş bulunmağla bir hatve ilerüye gidemediği sâmi'a-i evliyâ-yi umûra mevsûl ve esbâb-ı azîmeti mefkûd olduğundan kāle getürdüğü iʿtizârât müvecceh ve makbûl olup Kudüs Sancağı ile müşârünileyhe medd-i yed-i nevâziş ve Medîne-i Münevvere muhâfazası Cidde vâlisi Nablusî Mustafa Paşa'ya sipariş olunup, münhal olan Haleb Eyâleti sâbıka Kuds-i şerîf mutasarrıfı olan İbrâhîm Paşa'ya bâ-rütbe-i vezâret ihsân ve Diyârbekir seraskeri Ali Paşa'dan çendân bir hıdmet nümâyân olmadığından başka ahâli ve asker ile hüsn-i ülfeti olmayup azli istihsân olunmağla Aʿzaz ve Kilis sancaklariyle tezlîl ve Diyârbekir Eyâleti ve seraskerliği Uzun Abdullah Paşa uhdesine tahvîl olunup Ali Paşa'nın mukaddemâ ber-vech-i ilhâk mutasarrıf olduğu Rakka Eyâleti Vezîr Çerkes Hasan Paşa'ya inâyet ve Hüdâvendigâr Sancağı'yle Mîrâhur Mustafa Paşa mazhar-ı lûtf u mürüvvet kılındı.