Bir mâh mukaddem İstanbul Kazâsı'ndan munfasıl olan Bâbî-zâde es-Seyyid ʻAbdullah Efendi bir zemândan berü emrâz-ı gûnâ-gûn ile rencûr u haste ve ʻakıbet bâb-ı hayât ü zindegânîsi dest-i ecel ile muğlak u beste olup, füshat-serây-ı şehr-i hâmûşânda mukīm ve halkazen-i bâb-ı ni'me'l-me'âb-ı dâru'n-na'îm oldu. Ramazân-ı şerîf gurresinden Edirne Kazâsı'yla, sâbıkā Yenişehir-i fenâr Kadısı Hâfız Mehmed Efendi, karîn-i iʻzâz ve gurre-i zilkāʻdeden Burusa Kazâsı'yla, Yahyâ- zâde İbrâhîm Efendi, kâmet-efrâz-ı tebahtur u ihtizâz olup, Yenişehir Kazâsı'yla, es-Seyyid ʿAli Efendi dahi kesb-i imtiyâz eyledi. İzmir Mevleviyyeti ile gurre-i zilkaʿdeden Kadıʿasker ʿOsmân Efendi-zâde es-Seyyid Mehmed Emîn şâdân ve sene-i âtiye saferinden Şâm-ı cennet-meşâmm ile sâbıkā Galata Kadısı es-Seyyid Mehmed Efendi, pâ-nihâde-i merkez-i ʿizz ü şân oldu.