İstanbul Kadısı olan Dürrî-zâde Mehmed Nurullâh Efendi nâmzed olduğu hükûmetden dâmen-keş-i istiʿfâ ve birâder-i saʿd-ahteri olup, Mekke Pâyesi'yle sâbıkā Selânik Kadısı olan es-Seyyid Mehmed ʿAtâullah Efendi şehr-i rebîʿulevvelin on beşinci günü İstanbul Kazâsı'yla kâm-revâ oldu. Üsküdar'da bundan akdem menâr-ı şerîʿatı râfiʿ olan Mehmed Nâfiʿ Efendi, şehr-i receb gurresinden zabt etmek üzere Edirne Kazâsı'yla hürrem ve Çiçekçibaşı-zâde Feyzullah Efendi'nin Yenişehir-i Fenâr Kazası'yla gül-zâr-ı âmâli tarâvet-yâb-ı feyz-i Hâliku'n-nesem oldu. Sâbıkā Rumeli Kadıʿaskeri Karabekir Efendi-zâde ʿOsmân Efendi tekmîl-i müddet-i hayât ve terk-i meşgale-i kâyinât eyledi. Re'îsü'l-ʿulemâ olan Mirzâ-zâde es-Seyyid Mehmed Saʿîd Efendi, bir sene kadar Rumeli Sadâreti'ne sâye-endâz-ı şeref ve Anadolu'dan maʿzûl Başmakçı-zâde es-Seyyid Mehmed Efendi gurre-i recebde müşârun ileyhe niʿme'l-halef ve İstanbul Kadısı olan Dürrî-zâde ʿAtâʿullah Efendi birâderi isrine iktifâ ve kâr-ı düşvâr-ı hükûmetden istiʿfâ edüp, bâ-Pâye-i Mekke sâbıkā Mısır Kadısı olan İshak Efendi gurre-i cumâdelâhirede İstanbul Kadısı nasb u taʿyîn ve Şeyhulislâm İshak Efendi-zâde es-Seyyid Yahya Şerîf Efendi mâh-ı mezbûrun onuncu gününden İstanbul Pâyesi'ni ihrâz ile nâyil-i ʿizz ü temkîn olup, Mektûbî ʿAbdurrahîm Efendi'nin dahi hükûmet-i Burusa ile ser-i iʿtibârı vâsıl-ı çerh-i heftümîn oldu.