Mora'da vâkiʿ kılaʿ-ı Hâkāniyye'nin taʿmîr ü termîmi iktizây-ı hâle nazaran emr-i mühim ve şimdiden maslahat-ı mezkûreye mübâşeret lâzım olduğundan gayri o havâlîyi mazarrat-ı aʿdâdan himâye ve reʿâyâ vü berâyâyı her cihetden vikāye zımnında, Mora'ya mücâvir olan kazâlardan mikdâr-ı kifâye asker tahrîrine mübâşeret etmek bâbında, Anabolu Muhâfızı Sadr-ı esbak Muhsin-zâde Mehmed Paşa'ya hitâben emr-i ʿâlî sâdır ve elli bin guruş irsâliyle cebr-i hâtır kazıyyesine tebâdür olundu. Aydın Muhassıllığı, Rikâb-ı [M2 60] hümâyûn Kāyim-makāmı Vezîr Melek Mehmed Paşa'ya ve Eğriboz Sancağı, Yazıcı-zâde Vezîr Mustafa Paşa'ya tevcîh ve İç-il Sancağı'yla Vezîr Abaza Mehmed Paşa'nın hâli terfîh ve Sultan-önü Sancağı, Bender Muhâfızı Mîr-i mîrân'dan diğer Abaza Paşa'ya ʿinâyet ve Diyârbekir Vâlîsi ʿAbdulcelîl-zâde Mehmed Emîn Paşa ve Kengiri Sancağı Mutasarrıfı Mîr-i mîrân Ebûbekir Paşa, Bender Serʿaskeri maʿiyyetine taʿyîn olunup, bir ân akdem hidmet-i meʾmûrelerine vusûlleri tenbîh ü işâret olundu. Kırk gün inkızâsına dek levâzım-ı seferiyyesini itmâm ve Ordu-yi hümâyûn'a ʿatf-ı zimâm etmek şartıyla Mîr-i mîrân Süleymân Paşa vilâyeti tarafına gitmek ruhsatını tahsîl ve Ohri Sancağı Mutasarrıfı Bayram Paşa Kılburun Kalası muhâfazasına zâmile bend-i taʿcîl oldu. Kulle Kalası'nın muhâfazası dahi vâcib ve bir mikdâr asker taʿyîni ile ihtiyâta riʿâyet münâsib olduğuna binâʾen, Niğbolu Kazâsı'ndan iki ʿaded süvârî ve on dokuz kadar piyâde serdengeçdileri tahrîr olunup, iʿmâl ü idârelerine kādir mütemevvil kimselerden iki ağa intihâb ve tashîh-be-dergāh kılındıkdan sonra edây-ı hıdmet-i meʾmûrelerine şitâb etmeleri bâbında Ocak'dan mektûb ve Dîvân'dan emr-i bedîʿu'l-üslûb tahrîr ve münâsib Mübâşir ile tesyîr olundu. Mîr-i mîrândan Adana Aʿyânı Karslı-zâde Hasan Paşa iki bin piyâde tarafından techîz ve kesel ü betâʾeti ʿadem-i tecvîz ile vakt ü zemânında Ordu-yi hümâyûn'a gelmek irâde ve bu mukâbelede Adana Eyâleti ile gonça-i ikbâli küşâde kılındı. Sâyir eyâlât ü elviye askerine dahi evâmir-i ʿaliyye irsâl ve vaktiyle meʿmûr oldukları mahalle ʿazîmetleri istiʿcâl olunduğundan başka, Memâlik-i mahrûse'de dirlik erbâbı ve dûdmân-ı Bektâşiyye'ye intisâbı olanlara dahi evâmir ü mekâtîb ibʿâs ve sefer-i hümâyûna teveccühleri igrâ vü ihsâs olundu.