Bundan akdem mesned-i Hânî ile reşk-endâz-ı etrâb ü ekfâ ve me'mûr-i terk-tâz-ı memâlik-i aʿdâ olan Kırım Girây Han maʿiyyetinde olan Devlet-i ʿaliyye ve Tatar askeriyle Moskov memleketini taht ü târâc ve on bin kadar kefereyi sihâm-ı kazâya âmâc edüp, vâfir esîr u berde ile Kırım'a gelüp, bisât-ı râhatı küsterde etmişidi. Müşârun ileyh mevt-i fücâ'î ile rıhlet eylediği haberi, Silivri menzilinde vâsıl-ı sâmiʿa-i sudûr-i vâlâ-menzilet olmağla, maʿiyyetinde olan selâtîn ve mîrzâyân ve sâyir rü'esâ-yı kabâyil, Selâmet Girây Han-zâde Devlet Girây'ın hanlığını istisvâb eyledikleri vârid olan maʿrûzâtlarıyla ʿarz-ı südde-i muʿallâ-kıbâb kılınup, müsâʿade-i hümâyûn erzânî ve mûmâ ileyh ikʿâd-ı mastaba-i hânî kılındı.