Muhterik olan sefînenin kapudanı Çunkar Kapudan harîk gicesi sefînede bulunmayup, keyfiyyete vâkıf olduğu ân havf-i cân ile gürîzân olduğundan başka, Kapudan Paşa subh u mesâ hazm ü ihtiyâtı elden bırakmamak veyâ kendüsü bizzât ve yâhûd iʿtimâd eylediği kimseler ahvâl-i sefâyine ıttılâʿdan hâlî olmayup, vücûd ve ʿadem-i zâbitânı tahkīk u tashîh ve iktizâsına göre icrây-ı lâzime-i tebrîh u takrîh etmek eczây-ı mürekkebât-ı meʾmûriyyetinden iken, vukūʿ bulan mâdde mahzâ gaflet ve tekâsülüne mahmûl ve bâʿis-i iğbirâr-ı Pâdişâh-ı gayret-şümûl olup, Bostâncı-başı Ağa mübâşeretiyle Balıkhâne'de habs ve hayâtından kendüye ye's gelmişiken, Şehriyâr-ı Rüstem-be's, zuhûr eden hâlet-i müdhişeyi hükm-i kadere haml ile cürmünden iğmizâz ve muvâhaze-den iʿrâz eylediklerinden başka, Eğriboz Sancağı tevcîhiyle ihsân ve mürûʾeti tekmîl ve bu sunʿ-i cemîl ile mekârim-nâme-i Şâhâne'lerin sahâyif-i [M1 285] ʿâleme tabʿ ü temsîl eylediler. Rumeli Vâlîsi Vezîr Mehmed Paşa, sâniyen Deryâ Kapudanlığı ile tebcîl ve Âsitâne'ye gelinceye dek Vezîr Tevkīʿî Paşa tevkîl olunup, münhal olan Rumeli Eyâleti, Vidin Muhâfızı Vezîr Mehmed Paşa'ya ve Vidin Muhâfızlığı, Hotin Muhâfızı Vezîr Receb Paşa'ya ve Hotin, Eğriboz Muhâfızı Mîr-i mîrân'dan Ahmed Paşa-zâde Mehmed Paşa'ya tevcîh olundu. Tersâne Emîni Ahmed ʿİzzet Efendi dahi bu hâlet vukūʿu sebebi ile mebgūz u menfûr ve mübtelây-ı ʿazl-i nâgeh-zuhûr olup, Ağa-zâde Hüseyin Ağa, yerine meʾmûr ve Liman Reʾîsi Magosa Kalʿası'na iclâ ve hakkında o kadar ile iktifâ olundu.