Âdem deryâsından kinâyet ve müzdahimgâh-ı haşr ü neşrden ʿibâret olan Âsitâne-i saʿâdet-âşiyânede hengâm-ı germâ kıllet-i mâ ile şeyh u şâbb-tefsîde-i leb-i iztırâb olup, ihdâs-ı bend-i cedîd ile nâsa ifâza-i hayât-ı câvid niyyet-i hâlisası zamîr-i münîr-i Şehriyârî'de lâyih ü bedîd olup, Yenişehirli ʿOsmân Efendi'yi ʿâm-ı mâzîde bu hidmet-i celîleye me'mûr buyurmuşlar idi. Bend-i kadîme bir sâʿat mesâfe olan Evhadüddîn Deresi denmekle maʿrûf ve lisân-ı ʿavâmda Ayvâd Deresi şöhretiyle mevsûf olan mahalde vazʿ-ı esâs ve taʿyîn-i mikyâs kılınup, birkaç sâʿatlik mahalden mecârî-yi âba lağımlar ile istihkâm verilerek müceddeden inşâ ve âmâde olunan havuzda bir lüle mikdârı insıbâb-ı âb hâsıl ve mezkûr dere ile bend-i ʿatîka vâsıl olup, bu sebeble sulara kesret ve sekene-i İstanbul'a min-ciheti'l-mâ vüsʿat gelüp, duʿây-ı Pâdişâhî'ye muvâzabet eylediklerinden gayri, bu fiʿl-i cemîl Hudâvend-i İskender-mânend cenâblarına mûcib-i ecr-i cezîl ve sebeb-i tahsîl-i rızây-ı Rabb-i Celîl oldu. Zelzele sebebi ile bend-i ʿatîk yolları dahi rahne-gîr ve muhtâc-ı taʿmîr olduğu taraf-ı hümâyûna tezkîr olunup, bu bâbda dahi himmet-i Şâhâne ser-zede-i zuhûr ve taʿmîr ü termîmi içün muʿtemed kimseler me'mûr kılındı.