Müşârun ileyhin ʿale'l-ittısâl nümâyende olan ikbâline zevâl tetarruk ve ʿazl ü katline irâde-i kāhire-i Samedâniyye teʿalluk eyleyüp, şevvâlin yedinci hamîs günü mühr-i hümâyûn yedinden nezʿ ü istirdâd ve mübâşir maʿrifetiyle Midillü Cezîresi'ne nefy ü ibʿâd olunup, mühr-i hümâyûn Muhsin-zâde Vezîr Mehmed Paşa tarafına irsâl ve Zeyneb Sultân-ı ʿaliyyetü'ş-şânın şevher-i pâkîze-güherleri Vezîr Mehmed Paşa, Kāyim-makāmlık ile mahsûd-i emsâl kılındı. Sadr-ı sâbıka şiddet-i ittisâl ile teʿalluk ve intisâb şöhretini veren Defter Emîni Ahmed Kethudâ ve sâbıkā Tezkire-i Evvel Nâyilî birâderi Bekir Bey ve Kethudâ Kâtibi Penâh Süleymân Efendi ve Devâtdâr Tiryâkî Ahmed Ağa, Yedi-kulle'de bir iki gün habs olunup, hayâtlarından kemâl-i ye's hâsıl olmuşiken, Ah- med Kethudâ ve Bekir Bey, Limni'ye ve Penâh Efendi ile Devâtdâr Magosa'ya nefy ü iclâ olundu.