[M1 267] Kapudân-ı sâbık Vezîr Mehmed Paşa, Vidin Muhâfazasına me'mûr ve Râgıb Paşa dâmâdı Vezîr Hüseyin Paşa, Eğriboz Sancağı'yla nâyil-i etemm-i hubûr olup, Yeniçeri Ağası, Mîr-i mîrânlık ile Deryâya kapudan ve Kul Kethudâsı, Ağalık ile şâdân oldu. ʿİffetlü Zeyneb Sultân ʿaliyyetü'ş-şân Belgrad Vâlîsi Kapudân-ı esbak Vezîr Mehmed Paşa'ya bundan akdem ʿakd ü tezvîc olunup, müşârun ileyh şehr-i mezkûr hilâlinde Âsitâne-i saʿâdet'e vâsıl ve haclegâh-ı Sultânî'ye dâhil oldu. Sefâret'le Moskov diyârına ʿâzim ve hıtâm-ı me'mûriyyetle bu tarafa ʿâyid ü kādim olan Dervîş Efendi, hilâl-i râhda vefât ve teslîm-i vedîʿa-i hayât edüp, hezâr mihen ile cenâzesi Bender'e tavsîl ve bir münâsib mahalde tenzîl olundu. Evâsıt-ı ramazânda Tezkire-i Evvel olan Bekir Bey maʿzûl ve yerine Küçük Tezkireci Yesrî Efendi menkūl olup, Küçük Tezkirecilik ile ʿArif Süleymân Bey dilşâd ve Kethudâ Bey Kitâbetiyle, Penâh Süleymân Efendi ʿazlinden sâbıkı İbrâhîm Efendi ber-murâd oldu. ʿÎd-i fıtr gecesi erkân-ı Devlet-i ebed-kıyâm telsîm-i dâmen-i Şehriyâr-ı enâm ile şâd-kâm oldular.