Şehr-i ramazân hıtâm-pezîr olduğuna binâʾen, leyletü'l-ʿîd erkân-ı devlet-i ebed-imtidâd takbîl-i dâmen-i hümâyûn ile dilşâd oldular. Şevvâlü'l-mükerremin sekizinci hamîs günü ricâl-i bâb ve defterdârân ibkā olunup, Defter Emâneti, ʿAvnî Efendi'ye; Rûznâme, Binâ Emîni Yûsuf Efendi'ye; Başmuhasebe, Sıdkı Efendi'ye muvakkaten tevcîh olundu. Menâsıb-ı ümenâ ibkā olunup, Anadolu Muhasebesi, Muhsin-zâde birâderi Ahmed Bey'e; Mukābele, Yazıcı-yı esbak Halîl Efendi'ye; Haremeyn, Bekir Paşa-zâde Süleymân Bey'e; Yeniçeri Kitâbeti, Re'îs-i esbak ʿAbdullah Efendi'ye; Sipâh Kitâbeti, ʿAbdî Efendi yeğeni Mustafa Efendi'ye; Silahdâr Kitâbeti, Çelebi-zâde ʿAli Efendi'ye; Mevkūfât, Şâʿir İbrâhîm Efendi'ye ve sâyir menâsıb ber-vech-i münâsib erbâbına tevcîh ü ʿinâyet ve baʿzı hâcegân dahi ʿatâyây-ı Şâhâne ile vâreste-i kayd-ı zarûret oldu. Ocak ağaları dahi cümleten ibkā olunup, fekat Topçu-başılık, Mehmed Emîn Ağa'ya tevcîh olundu. Vüzerây-ı ʿizâm hazerâtının dahi mutasarrıf oldukları menâsıb karîbü'l-ʿahdde mübâdele kabûl etdiğinden, ekseri takrîr ü ibkā ve yerlerinden ʿadem-i tahrîk ile istihsâl-i âsâyiş-i fukarâ vü zuʿafâ olundu.