Şehr-i mezkûrda rûy-i hevâ zulmet-i ebr ile mükfehirr ve savt-ı raʿd-ı [M1 218] hevlnâkden vücûd-i insânî mukşaʿirr olup, Tersâne-i ʿâmire'de merbût sefâyinin birine sâʿika nâzil ve sütûnunu sarup, maʿâzallah bir emr-i hâyil zuhûru muhtemel iken, ʿinâyet-i Bârî hâyil olup, ricâl-i Tersâne berzede-dâmân-ı ihtimâm ve sefîneyi deryâya ihrâc ve sütûnunu katʿ u ilkā ile itfâsına nakdîne-nisâr-ı saʿy ü ikdâm oldular. Sevâhil-i Bahr-i sefîdi muhafaza zımnında bundan akdem Kapudan Paşa Donanma-yı hümâyûn ile şirâʿ-güşâ-yı ʿazîmet olmuşidi. Fühûlet-i hevâ ve güzâreş-i mevsim-i deryâ sebebi ile fekk-i lenger-i ikāmet ve top şenliği eyleyerek Tersâne'ye vazʿ-ı raht-ı ikāmet eyledi. Cânik sükkânından Çavuş-oğlu dedikleri merd-i bî-hûş muktezây-ı re'y-i mağşûş ile hilaʿ-i ribka-i inkıyâd ve Nikhisâr Kalʿası'nı zabt ile izhâr-ı bağy ü ʿinâd eyleyüp, o havâlî askeri ikdâmıyla kalʿadan ihrâc ve kârı itmâm olundu. Yeniçeri mahlûlâtının hazîneye ʿâid sülüsânından mâ-ʿadâsı terakkıyât-ı kānûniyyeye ve ocağa dâyir sâyir umûr-ı maʿlûmeye sarf olunup, kulluk bekleyen neferâta dahi sülüs-i bâkīden esâme verilmek ve müşâbehet-i isim sebebi ile mahlûlü ihfâdan ve beyʿ ü şirâdan tevakkī etmek bâbında sâdır olan hatt-ı hümâyûn ocağlu mahzarında kırâ'et ve mazmûnu cümleye işâʿat olundu. Şehremîni Hâşim ʿAli Bey, zikr-i âtî binâya Emîn nasb olunmuşiken ʿazl ve Başmuhasebe'ye nakl olunup, sâbıkā Kethudâ Kâtibi ʿÖmer Efendi, Şehremâneti ile tahsîl-i mukaddimât-i ikbâl ve Kethudâ Bey Kalemi Baş-halîfesi İbrâhîm Efendi, Kitâbet-i mezkûre ile iktisâb-ı re'sü'l-mâl-i âmâl eyleyüp, Baş-halîfelik, hüner ü dânişi cihânın güneşi gibi zâhir olan es-Seyyid Mehmed Hayrî Efendi'nin semere-i zahmet ü gûşişi ve cezây-ı hüsn-i hulk u revişi oldu. Sâbıkā Kıbrıs Muhassılı olan ʿAcem ʿAli Ağa, Emîn-i Matbah-ı ʿÂmire ve Mısırlı Hüseyin Ağa, Surre Emâneti ile lâbis-i hilʿat-i fâhire oldu.