Sadrıaʿzam ve bedr-i efham Râgıb Paşa sinîn-i çendînden berü cemʿ u intihâb ve celb ü istiktâb eylediği kütüb-i kesîreyi telef ü izâʿatden ictinâb ve istifâde-i nâsa medâr olarak bir Kitâb-hâne binâsıyla tahsîl-i ecr ü sevâb etmek lâyih-i hâtırları olduğundan başka, bir mekteb izâfesiyle etfâle taʿlîm-i Kur'ân ve telkīn-i edeb ü ʿirfân olunmak fikri bir müddetden berü zihninde cevelân eyleyüp, Koska'da baʿzı emâkin iştirâ ve ashâbını irzâ ile işbu muharrem evâyilinde vazʿ-ı esâs ve darb-ı tîşe vü fe's kılındı.