Şeyhulislâm ve müşkil-güşâ-yı hâss u ʿâmm olan Veliyyüddîn Efendi'nin mahdûmu olup, müderrisîn zümresine iltihâk eden Mustafa Reşîd Efendi, hırâmân-ı ravza-i cinân oldu. Ve Şeyhulislâm Kara Halîl Efendi-zâde ʿAbdurrahîm Monla dahi bu târîhde ʿâzim-i serâbistân-ı bekā oldu. Defterdar-ı sâbık ve hâlâ Tevkīʿî olan Râmî Paşa-zâde Mustafa Beyefendi dahi birkaç gün maraz-ı nâgeh-zuhûra mübtelâ ve girîbân-ı hayâtı müsellem-i ser-pençe-i ecel-i müsemmâ oldu. Mûmâ ileyh meʿârif ve kemâlâtdan haberdâr ve Nâyil mahlasıyla şiʿre heveskâr olup, vefâtlarına karîb Kutbî Efendi'den münîb olmuşidi. Şıkk-ı Sânî mülakkab Sâlih Efendi, dağdağa-i dünyâdan dest-şû ve cânib-i âhirete tâfte-rû oldu. Mûmâ ileyh yeke-süvâr-ı meydân-ı ʿirfân ve kûy-i rubây-ı sahn-ı fehm ü itkān, ʿilm-i muhâdarâtda Râgıb İsfehânî ve sebk-i kelâmda sânî-yi Bedîʿ-i Hemedânî olup, udhûke ve mucûna dâ'yir bir mecmûʿa-i garîbe tertîb ve nevâdir hikâyât ve eşʿâr ile tebvîb eylediğinden gayri, hattıyla Vassâf Târîhi ve sâyir edeb kitâbları manzûr ve eşʿârı dahi makbûl-i ecille-i cumhûr idi. Ancak lâ-ubâlî meşreb ve vâsiʿu'l-mezheb, lehv ü tarab-kârî ve irtişâf-ı leb-i câm hulâsa-i efkârı idi. Tecâvezallâhi ʿan seyyiʾâtihi. ʿÂrifî dâmâdı Süleymân Bey, Şıkk-ı Sânî ve sâbıkā Kethudâ Kâtibi Safâyî Efendi, Şıkk-ı Sâlis ve ihtiyâr Bekir Bey, Tevkīʿî nasb ü taʿyîn ve hılâʿ-ı Pâdişâhî ile kāmet-i istîhâlleri tezyîn olundu.