Şehr-i recebün on ikinci günü beher sâl fukarâ-yı Haremeyn'e îsâl oluna gelen Surre-i hümâyûn, Emîn nasb olunan Bostâncı-başı-yı sâbık Halîl Ağa ile mahalline irsâl olundu. Medîne-i münevvere tevcîh olunan Şaʿbân-zâde Ahmed Efendi, pîr ü ʿalîl ve katʿ-ı beyâbân-ı Hicâz'a tâb-âver olamayacağı vâreste-i delîl ve bu sebeble mazhar-ı ʿafv-ı cemîl olup, Altunucuk-zâde ʿAbdullah Efendi'nin iktidârı mevsûm olduğu iştihârından mübeyyen ve Medîne-i münevvere Kazâsı, hakkında müteʿayyen oldu. Deryâ kapudanı olan Vezîr Mustafa Paşa, umûr-i deryâdan gâfil olduğuna binâ'en, evâhır-ı recebde münʿazil olup, Belgrad Muhâfazası'na taʿyîn ve Belgrad Vâlîsi bulunan Vezîr Hasan Paşa, Deryâ Kapudanlığı'nda temkîn olundu. Fuzalây-ı asırdan sâbıkā Haleb Kadısı Kilîsî Hüseyin Efendi, Edirne Kazâsı'yla [M1 194] müteheyyi’-i tedârük-i zâd ve Murâd-zâde Seyyid Ahmed Efendi, Galata Kazâsı'yla ber-murâd oldu. Moldovancı ʿAli Ağa, baʿzı husûs ru'yeti içün Filibe cânibine me'mûr olmuşidi. İnkızây-ı maslahat akabinde Âsitâne'ye vârid ve Bostâncı-başılık ile hâyiz-i irkāy-ı mesânid oldu. Şaʿbânü'l-muʿazzamın on dördüncü gün zimmet-i devletde deyn olan mevâcib-i kısteyn ihrâcıyla nüfûs-i kesîre mâlik-i lüceyn ü ʿayn oldu. Baʿzı mahallerde ashâb-ı düyûn, şiddet-i takâzâ ile zebûn oldukları semʿ-i hümâyûna makrûn olup, dâyinleri irzâ ve sebîlleri ihlâ olunmak üzere taraf-ı vâzıhu'ş-şeref-i Tâcdârî'den vâfir meblağ iʿtâsıyla ecr-i vefîr ve sevâb-ı kesîr ibtigā olunundu.