Bâlâda tahrîr ü ifade olunduğu vechile Şerîf Müsâʿid ʿazl olunup, birâderi Şerîf Caʿfer, Emâret-i Mekke-i mükerreme ile muvakkar kılınmışidi. Şerîf Müsâʿid, Mekke-i mükerreme'ye bir sâʿat mesâfede vâkiʿ Ümm-i ʿÂbid'e nâm mahalde ikāmet ve esbâb-ı husûl-i matlabını custucûya mübâşeret eyleyüp, baʿzı aʿzâr îrâdıyla Mekke'de ârâmsâz-ı istirâhat olmak iltimâsını Cidde Vâlîsi Vezîr Saʿdeddîn Paşa'ya ve sâyir [M1 176] vücûh-i Mekke'ye tebliğ ve anlar dahi Mekke'de ikāmetini tesvîg etmişler idi. Şerîf-i maʿzûl sâlhurde ve mücerreb-i rûzgâr ve halefi sagîru's-sinn ve gâfil-i etvâr-ı çarh-ı devvâr olduğundan başka, Şerîf Müsâʿid sekiz sene kadar Emâret-i Mekke ile şeref-yâb ve ehâlî ve vücûh kavlen ve fiʿlen ʿinâyet ü lütfunu iktisâb eyleyüp, bâ-husûs tavâyif-i ʿArab havf-i siyâset ve tedbîriyle dâhil-i dâ'ire-i hadd ü edeb olup, Emîr-i hâc Paşa Medîne-yi münevvereyi tecâvüz etdiğini tahmîn ve küçük birâderinden Şerâfet'i taleb edüp, hevâdâr-ı kadîmlerinin dahi kendüye muʿîn olduklarını Şerîf Caʿfer ʿilme'l-yakîn fehm ü idrâk ile zarûrî rızâ gösterüp, fitneyi teskîn etmişidi. Şerîf Müsâʿid Çeteci Paşa'dan şikâyet ve hakkında tertîb olunan mevâdd-ı iftirâ ve baʿzı tüccâr ilkāsıyla Mısır Mîrü'l-hâccının tamaʿından münbaʿis bir keyfiyyet olduğunu ve el-hâletü hâzihî Emâret'i birâderi kendüye ferâğat etdiyse dahi irâde-i devlete mutâʿavat üzere olduğunu îmâ vü işâret eylediğinden başka, Mezâhib-i erbaʿa müftîleri dahi kavlini tasdîk ile tertîb eyledikleri ʿarz ve mahzarlarını Bağdâd cânibinden Âsitâne-i saʿâdet'e göndermişler idi. Keyfiyyet rikâb-ı kamer-tâba ʿarzolunup, huzûr-i hümâyûnda bu keyfiyyet meşveret olunmak irâdesiyle Sadrıaʿzam ve Şeyhülislâm ve Tevkīʿî Vezîr Mustafa Paşa ve sudûr-ı kirâm ve Nakībü'l-eşrâf ve Yeniçeri Ağası ve Sekban-başı ve ʿuzemây-ı ricâl-i Devlet Soğuk-çeşme kapusundan dühûl ve Arslan-hâne taʿbîr olunan odada baʿde'l-ictimâʿ Silâhdar Ağa delâletiyle cümlesi huzûr-i hümâyûna dühûl eylediler. Şerîf Müsâʿid'in tahrîrât ve ʿarz-ı mahzar tercümeleri kırâ'et olunup, huzzâr istintâk olundukda, Şerîf Müsâʿid'in Emâret-i Mekke'de istikrârı ve fî-mâ-baʿd Çeteci ʿAbdullah Paşa'nın Mîr-i hâclığında fitne ve gavgā hudûs edeceği beyânıyla âharın nasbı cümlenin muhtârı olduğu hülâsa-i bahs ve teʿâruzdan maʿlûm-i Tâcdârî olup, Emâret-i hâc bi'l-ittifâk Cerdeci Vezîr Çelik Mehmed Paşa'da eğerçi karâr edüp, ancak Trablus-şâm ve Sayda eyâletlerinin dahi kaydı görülüp, birer münâsib Vâlî mülâhaza ve iki günden sonra yine huzûr-i hümâyûnda ʿakd-i meclis-i meşveret kılınmak cümleye ifade olunmuşidi. İki günden sonra yine minvâl-i sâbık üzere erbâb-ı şûrâ huzûr-i hümâyûnda ictimâʿ edüp, Esʿad Paşa Kethudâsı olup, ʿahd-i baʿîdden berü Hama ve Humus Mütesellimliği ile kesb-i şöhret ve o tarafların ahvâline vukūf ile tahsîl-i [M1 177] meleke vü kābiliyyet eden ʿOsmân Ağa'ya rütbe-i Mîr-i mîrânî ile Cerdecilik ve Trablusşam Eyâleti ve bundan akdem şükâtı hasebiyle Vezâret'i refʿ olunan Vezîr Nuʿmân Paşa'ya ibkā-yı Vezâret'iyle Sayda Eyâleti, karargîr-i erbâb-ı re'y ü tedbîr olup, taraf-ı hümâyûndan dahi sûret-i müsâʿade ʿaks-endâz merrât vukūʿ olmağla, meclise hitâm ve herkes semti- ne ʿatf-ı zimâm eyleyüp, Sadrıaʿzam Bâb-ı ʿâlî'ye geldikde, ittifâk-ı ârâ ile nizâm bulan menâsıb-ı mezkûreyi müşârun ileyhime tevcîh ve Mîrü'l-hâcc-ı sâbık Çeteci ʿAbdullah Paşa'yı Diyârbekir Eyâleti'yle kutr-ı Hicâz'dan tebʿîd ü tenzîh edüp, sâbıkā Diyârbekir Vâlîsi Sadr-ı esbak ʿAbdullah Paşa'ya Halebü'ş-şehbâ tevcîhiyle Tevkīʿî Mustafa Paşa bilâ-mansıb kalup, taraf-ı mîrîden beher mâh altı bin guruş verilmek bâbında Başmuhâsebeden sûret iʿtâ olundu.