Müftiyyü'l-vakt bulunan Mehmed Sâlih Efendi, ahlâk-ı hamîde ve evsâf-ı bergüzîde ile müteʿâref ve eltâf-ı mâ-lâ nihâyesi erbâb-ı haysiyyet ü istîhâle mütezâʿif ve müterâdif iken, “ve eyyü kerîmin lem tusibhü'n-nevâyib.” medlûlü üzere işbu zilkaʿde evâyilinde musîbet-i ʿazl ile mütekeddir ve Kanlıca'da vâkiʿ sâhil-hânesinde ikāmetle tesliyyet-bahş-ı hâtır oldu. Rumeli Pâyesi'yle sâbıkā Anadolu Kadıʿaskeri olup, ʿilm ü hünerde ʿilm ü fazl ü edebde Yahyâ bin Ektem olan Çelebî-zâde ʿÂsım Efendi, yevm-i mezkûrda telebbüs-i hilʿat-i beyzâ ile zîb-ârâ-yı mesned-i fetvâ oldu.