Şevvâlü'l-mükerremin beşinci günü Donanma-yı hümâyûn'un ihrâcı musammem olmakdan nâşî, Sadrıaʿzam ve Şeyhulislâm Efendi ve sâyirleri Yalı-köşküne râhî ve muntazır-ı kudûm-i Pâdişâhî olmuşlar idi. Dâver-i zemân ve Hâkān-ı Ferîdûn-tüvân dahi kasr-ı mezkûre pâ-nihâde-i şevket ü şân olduklarında, Kapudan Paşa vârid ve muʿtâd olan kürkünü telebbüs ile zirve-i cebel-i rifʿate mütesâʿıd olup, bir iki gün Kabataş semtinde ikāmet ve Bahr-i Sefîd cânibine ʿazîmet eyledi.