Mûmâ ileyh ʿan-asl Mardin Voyvodası Mehmed Efendi'nin etbâʿından olup, Sadrıaʿzam Rakka Vâlîsi iken dâyiresine intisâb ile mâye-i husûsiyet-i iktisâb etmişidi. Ancak felâket-zede ve köhne-pûş ve beytü'l-humâr-ı fakr u fâkadan cürʿa-nûş olduğundan, sâyir Enderûnîler gibi ilerüye tekaddümden ve hidmete telâzümden mücânebet eylediğini müşârun ileyh tefattun edüp, hâline merhamet ve bir hidmetle refâh-ı hâline himmet ve baʿzan istintâk ve zâtında mütâlaʿa-i kābiliyyet ve istihkāk eyleyüp Hazînedâr ve akrânı beyninde mûmâ ileyhi ʿâlî-mikdâr eyledi. Bir müddet murûrunda Kethudâ ve şeref-i sıhriyyet ile zâtını mahsûd-i etrâb ve ekfâ eyleyüp, Haleb'den Sadr'ı teşrîflerinde Silahdâr Ağalığı'yla merâtib-i devlete kesb-i istiʿdâd etdirdüp, çok geçmeden Mîrahûr-i Evvel ve Istabl-ı ʿâmire'de mâlik-i zimâm-ı ʿakd ü hal olmuşidi. Rakka Vâlîsi Vezîr Dîbâyî-zâde İbrâhîm Paşa, ehl-i Ruha ile imtizâc edemediğinden cümlesi ittifâk ve şehirden ihrâcına şedd-i nitâk ve müşârun ileyh dahi dimâ-i nâs ihrâkından hazer ile şehirden nehzat eylediğini tarafeyn daʿvâlarını te'yîd ederek ʿarz-ı Der-i devlet eylediler. Rakka Eyâleti, mecmaʿ-ı ʿaşâyir u kabâyil ve mevtin-ı esâfil ü erâzil olup, zabtının ciheti ve umûrunun idâre vü ru'yeti dahi sâyir memleketlere müşâbehetden âbî ve beher hâl o tarafların keyfiyyâtına vâkıf bir zât-ı ʿâlî-cenâbın o cânibde vücûdu evliyây-ı umûrun hülâsa-i selb ü îcâbı olmağla, Ağa-yı mûmâ ileyh [M1 120] Rakka ve Mardin ve Diyarbekir ve Haleb eyâletlerinde sinîn-i mütetâvileden berü geşt ü güzâr ve semt-i hükûmet ve zabtını ʿaynen ve semāʿan ihtibâr eylediğinden, rütbe-i vâlây-ı Vezâret'le Eyâlet-i mezkûrenin tevcîhinde olan mehâsin maʿrûz-ı südde-i Şehinşâhî kılındıkda, Eyâlet-i Rakka inzımâmıyla Vezâret'i istihsân olunmağla, evâyil-i zilhiccede Bâb-ı ʿâlî'ye daʿvet ve dûş-ı istihkākına ilbâs-ı ferve-i Vezâret kılınup, Rakka'ya Vâlî ve beş altı gün zarfında hareketi içün ısdâr-ı emr-i ʿâlî kılınup, fi'l-hakīka birkaç gün murûrunda dâyiresini pezîrefte-i temşiyet ve Rakka tarafına tahrîk-i aʿlâm-ı saʿâdet eyledi. Müşârun ileyhin Vezâreti'yle münhal olan Büyük Mîrahûrluk, Kapucular Kethudâsı vekîli Mustafa Ağa'ya tevcîh ve vekâleti Abdâl Mehmed Ağa'ya sipariş olunup, Kapucular Kethudâsı Kırîmî Hüseyin Ağa, Boğdan Voyvodası'nı îsâle me'mûr olmağla, vekâleti Ruhalı Mehmed Ağa'ya ve Mîrahûr-i Sânî Seyyid Ahmed Ağa Mısır'da olmağın, anın dahi vekâleti ʿIvaz Paşa-zâde ʿAli Bey'e tefvîz olundu.