Şehinşâh-ı âlî-tebâr hazretlerinin hemşîre-i muhteremeleri ʿismetlu Sâliha Sultân hazretlerinin mâlik-i zimâm nakz ü ibrâm olan Sadr-ı vâlâ-makāma ʿakd ü tezvîci irâde olunup, Sadr-ı âlî-mikdâr bu latîfe-i nâgeh-zuhûru mahzâ eltâf-ı İlâhiyye'den ʿadd ü şumâr ve tertîb-i mukaddime-i ʿakde mühr-i fuʾâdını nisâr edüp, mücevherât ve eşyây-ı sâyireyi istikmâl ve sene ihdâ ve sebʿîn ve mi’e ve elf recebinin yirmi birinci pençşenbih günü semâhatlü Şeyhulislâm Efendi, Baltacılar Kethudâsı Ağa ile müşârun ileyhâ hazretlerinin kurb-i hazret-i Hâlid'de vâkiʿ sâhil-serâlarına daʿvet olunup, emre imtisâl ve muʿtâd-ı kadîm üzere Dârü's-saʿâde Ağası dahi taraf-ı Sultânî'den [M1 111] ʿakde vekîl nasb olunup, ol dahi mahall-i mezkûre tahrîk-i mikzâf-ı istiʿcâl ve ağırlık nâmıyla hâzır u âmâde kılınan mücevherât ve eşyây-ı sâyire sandûkalara vazʿ ve iki kıtʿa asma koçilere tahmîl ve Sadriaʿzam Hazîne Kâtibi ile ʿale's-seher sâhil-serây-ı Sultânî'ye tesbîl olunmuşidi. Müşârun ileyh tarafından vekîl nasb olunan Kethudâ Bey dahi hâzır olup, Şeyhulislâm Efendi, müşârun ileyhâ hazretlerini muʿtâd olan mihr-i mü'eccel ile ʿakd edüp, Şeyhulislâm Efendi ve Dârü's-saʿâde Ağası'na birer boğça ile semmûr kürkler ihdâ ve Kethudâ Bey'e iksâ olunup, baʿde't-taʿâm yerlü yerine ʿazîmete kıyâm eylediler. Yevm-i ʿakdin ferdâsı istifsâr-ı hâtır-ı hazret-i Sultânî zımnında, taraf-ı Sadâret-penâhî'den bir kıtʿa sîm sini üzerinde kapaklarıyla on kıtʿa sîm sahan ve bir kıta sîm tas envâʿ-ı şekerleme ile memlû kılünup, otuz tabla şükûfe ve elli tabla meyve ve sâyir bâkûre esmâr ve gûnâ-gûn ezhâr, Kapucular Bölük-başısı ile tesyâr olundu. Şaʿbân-ı şerîfin beşinci günü ʿismetlü Sultân-ı ʿaliyyetü'ş-şân hazretlerinin harem-i serây-ı Âsafî'ye bilâ-resm teşrîfleri irâde ve Kethudâ Bey, daʿvetlerine firistâde olundu. Sâʿat beşde Sultân hazretlerinin Kethudâ ve Baş-ağa ve sâyir Harem ağaları rûz-merre destâr ile ve çavuşân-ı Dîvân telleriyle pîş ü pes gerdûne-i ʿismet-nümûnelerinde bi-lâ Mehterhâne âheste reftâr ile Serây-ı Âsafî'ye vazʿ-ı pây-ı meymenet ve Harem kapusu dâhilinde Sadriaʿzam ʿarabalarını selâmlayup, bilâ-tevakkuf ʿArz Odası'na ʿavdet eyledi. Baʿde'l-mağrib ber-vech-i muʿtâd Dârü's-saʿâde Ağası gelüp, salât-ı ʿışâ edâ olundukdan sonra bi'l-mürâfaka Harem'e duhûl ve Ağa-yı müşârun ileyh fi'l-hâl kufûl ve keşîde-i seng-i rikâb zehâb kılınan müzeyyen esbe râkib ve Serây-ı hümâyûn'a âyib oldular. Ferdâ-yı leyletü'l-ʿarûsde Pâdişâh-ı vâlâ-cenâb Sultân Bâyezîd Câmiʿi'nden farîza-i cumʿayı baʿde'l-edâ Bâb-ı âlî'ye şeref-bahş-ı vürûd olacağlarını işrâb buyurmuşlar idi. Muʿtâd üzere ʿArz Odası tezyîn ve ber-mantûk-ı: Bağbân ez-gül-i müşeccer perdehâ tertîb dih / Şâh mî âyed be-gülşen-i fikr pâ-endâz-kun Şâh-râh-ı hümâyûnları ferş-i dîbây-ı rûmî ile revnak-şiken-i nigâr-ı hâne-i çîn kılınup, kudûm-i feyz-lüzûm-i Pâdişâhî haberi vârid olduğu [M1 112] hengâm, Sadr-ı vâlâ-makām zokāk kapusundan istikbâl ile izhâr-ı fürûtenî ihtirâm ve pîşgâh-ı zıll-i İlâhî'de hirâm eyleyerek seng-i rikâba tekarrublarında zebh-i ağnâm ile fukarâ vü eytâm şâd-kâm kılınup, ‘Arz Odası'nı bi'd-devleti ve'l-ikbâl teşrîf ve Sadriaʿzamlarını tehniye ile taltîf ʿakabinde Harem-Serây-ı Sultânî'ye pâ-nihâde-i şevket ve celse-i hafîfeden sonra Kum-meydanı'na nâzır gurfe-i bî-hemtâya rağbet ve cirîd-bâzları temâşâ ve baʿde'l-ʿasr tenâvül-i taʿâm ve hıtâmında Sadrıaʿzam'ı serâ-sere kaplu semmûr ile mesrûr ve müşârun ileyh tarafından tezyîn olunan esbe süvâr ile Serây-ı hümâyûnlarını reşk-endâz-makām-ı hûr buyurdular.