Kitâbet-i mezkûre gâh Yazıcı hulefâsına ve gâh Teberdârân-ı Serây-ı ʿatîk Ocağı'nda erbâb-ı kemâlden olanlara ve baʿzan Gulâmân-ı Kapucıyân'dan zümre-i hâcegâna iltihâk edenlere sipâriş oluna gelüp, kāʿide-i muttarride tahtına dâhil ve her bâr bir sınıfa vâsıl değil idi. Bundan akdem Yazıcı Baş-halîfesi Mehmed Bey, Dârü's-saʿâde Ağası Kâtibi nasb olunup, hidmeti çendân meşkûr olmadığından, recebin on beşinci günü ʿazl ve mukaddemâ Hâne-i Hâssa'dan Kitâbhâne Tevliyyeti ile çırâğ olan Köse Halîl Paşa hafîdi ʿAli Bey, mîr-i mezkûrun yerine nakl olunup, Devlet-i ʿaliyye işine yarayanı kullanmak ve emek ve hidmet iddiʿâ-yı bâtılı ile daʿvâ-yı istihkāk edenleri zımnen terbiye etmek vâdîsinde taraf-ı hümâyûndan sudûr eden işbu şîve-i dil-pezîr pesendîde-i sagīr u kebîr oldu.