Bâlâda ber-vech-i icmâl güzârende-i zebân-ı kalem-i kelîlü'l-beyân olduğu vech üzere emvâl-i Haremeyn'e nizâm verilüp, bu tasarrufât-ı ʿakliyyeden baʿde'd-dahl ve'l-hurûc bin kîse fazla peydâ ve Enderûn Hazînesi'nde ihtizân olunup, bi'l-iktizâ umûr-i Haremeyn-i şerîfeyn'e sarf olunmak matlûb-i Pâdişâh-ı Felâtûn-ârâ olmuşidi. ʿUlûfe Dîvânı günü ʿAtîk Dîvân-hâne semtinde zikr olunan mebâliğ tûde tûde kılınup, Sad- riaʿzam ve Kapudan Paşa ve Sadreyn ve Defterdâr Efendi, İç Hazîne'ye ʿazîmet ve Bîrûn hâzinleri nakl ü taʿdâda mübâşeret ve hıtâmı haberi ʿarz-ı südde-i saʿâdet kılındıkda, Şehriyâr-ı zemân Bâbü's-saʿâde tarafından nümâyân ve cümlesi istikbâl ve İç Hazîne'de ârâste olan taht-ı hümâyûna hâzinlerin ferş etdikleri dîbâyı basarak vazʿ-ı pây-ı ikbâl buyurup, mâl-ı mezkûr manzûr ve Sadriaʿzam'ın hidmeti meşkûr olduğundan, kapaniçe taʿbîr olunur hilʿat-ı fâhire-i Mülûkâne ilbâsı ile nâyil-i fahr-i nâ-mahsûr ve sâyirleri dahi hazîne ʿatabesinde hılaʿ-ı zâhire iktisâsıyla mesrûr oldular.