Pâdişâh-ı bahr ü berr dâme mâ-dâme'l-felekü'l-ahdar hazretleri umûr-i Devlet-i ʿaliyye'lerine kemâ-yenbagī himmet ve: Leyse'l-haberü ke'l-ʿıyân mefhûmu üzere baʿzı mahalli ru'yet ve ıslâh-ı haleline mübâşeret irâdesinde olduklarından, evâ'il-i rebîʿulâhırda Tersâne-i ʿâmire'ye teveccüh buyuracağlarını Sadr-ı vâlâ-cenâba emr ü hitâb ve kendülerinin dahi Tersâne'de bulunmalarını telmîh ü işrâb buyurmuşlar idi. Yevm-i mezkûrda kapu takımıyla Sadrıaʿzam Tersâne'ye ʿazîmet ve yarım sâʿatdan sonra Şehriyâr-ı Dârâ-dürbet dahi mahall-i mezkûru talʿat-ı hümâyûnlarıyla pür-behcet buyurup, Tersâne kasrına pâ-nihâde-i ikbâl ve Sadrıaʿzam ve Kapudan Paşa hâk-i pây-i hümâyûnlarına rû-mâl ve bir mikdâr ârâmdan sonra mahzenleri seyr ü temâşâ ve bu behâne ile murâbitîn ve mücâhidîni bezl-i sehâ ile nâyil-i nefʿ ü cedvâ etmek irâdeleri, mir'ât-ı tabʿ-ı Tâcdârî'lerinde sûret-nümâ olmağla, Sadrıaʿzam tarafından âmâde kılınan esb-i berk-reftâra süvâr ve ʿâdet-i Tersâne üzere [M1 105] müşârun ileyh ve Kapudan Paşa sadefkârî ʿasâ ile pîşgâh-ı zıll-i İlâhî'de kesb-i iftihâr eyleyerek evvelâ mahzen-i sürb ve baʿdehû mahzen-i çûpa duhûl ve bilâ-meks ʿavdet ve Tersâne bağçesine nüzûl buyurdular. Sadrıaʿzam câmiʿ altında vâkiʿ sancak Kapudanlarına mahsûs olan odada vakfa-gîr-i ârâm oldukları hengâm deryây-ı kerem-i Şâhâne telâtum ve Kapudan ve mülâzimîn ve sâyire tekāsum içün yirmi bin guruşluk zer-i mahbûb, Hazîne Kethudâsı maʿrifetiyle Sadrıaʿzam tarafına getürülüp, vech-i lâyıkı üzere herkese hisse ifrâzıyla isticlâb-ı kulûb-i erbâb-ı mücâhide vü tesâdum eyledi.