Müşârun ileyh devr-i ʿOsmân Hânîde manzûr ve Mîrahûrluk'dan bâ-Vezâret Rumeli mansıbı ile mesrûr ve bir müddetden sonra Deryâ Kapudanlığı ile mahsûd-i evliyây-ı umûr olmuşidi. Cülûs-i hümâyûn vukūʿunda sadr-ı devlete takrîb olunmak kazıyyesi Sadrıaʿzam'ı meslûbü'ş-şuʿûr edüp, baʿzı şükât tedârüküyle mebde’-i saltanatda müşârun ileyhi menfûr etmişidi. Binâʾen ʿalâ zâlik âhır-ı saferde müşârun ileyh ʿazl olunup, Ak-deniz'den aldığı muʿayyenât ki zulmiyye ismiyle sâmiʿa-i hümâyûna ilkā olunmuşidi. İstirdâd ve edâ [M1 98] olunmak içün emvâli musâdere ve kendüsü İstanköy'e iclâ olunup, Karabâgī Vezîr Süleymân Paşa bu defʿa dahi Deryâ Kapudanlığı'yla kâm-revâ oldu.