Müftiyyü'l-enâm olan Dürrî-zâde Mustafa Efendi, şehr-i merkūmun yirmi sekizinci günü merâret-i ʿazl ile telah-kâm ve Gelibolu'da ikāmeti murâd-ı Şehriyârî-enâm olup, Şeyhulislâm-ı sabık Dâmâd-zâde Feyzullâh Efendi, ber-vech-i tekrâr o mesned-i vâlâ ile celîlü'l-mikdâr oldu. Şehr-i recebü'l-ferdin on ikinci günü Kāyim-makām-ı sadr-ı benâm olan Vezîr ʿAli Paşa'ya, Halebü'ş-şehbâ Eyâleti tevcîh olunup, Bahr-i İskenderun'a ʿazîmet ve râkib olduğu kalyon Kapudan-ı müşârun ileyhi selâmetle sâhil-i merkūma ihrâc etdikden sonra Mısır tevcîh olunun Vezîr Saʿdeddîn Paşa'yı Mısır'a ve selefi Sadr-ı esbak Hekîm-zâde ʿAli Paşa'yı, sâhil-i Rum'dan kangi sâhile mümkün olursa ihrâca mübâşeret eylemesi tenbîh olundu. Yevm-i mezkûrda sükkân-ı Haremeyn-i şerîfeyn'e be-her sâl tahsîs olunan Surre-i hümâyûny, Haremeyn hazînesinden ifrâz ve Surre Emîni nasb olunan Ser-bostâniyân-ı sâbık Ahmed Ağa'ya teslîm olunup, ru'yet-i levâzımı ‘akabinde licâm-ı ‘azîmeti mun'atif-i savb-ı Hicâz kılındı.