Sirke ʿOsmân Paşa-zâde turş-rûy-i zemâneden dil-hırâş ve cüz’î meʿâş ile Edirne'de intiʿâş eyler idi. Hakkında müsâʿade-i rüzgâr-ı yâr ve bâ-rütbe-i Mîr-i mîrânî Seddü'l-bahr muhâfazasıyla sâhil-res-i çâr-mevce-i ekdâr oldu. Sâbıkā Mîrahûr-i Sânî Ağa-babası-zâde İbrâhîm Ağa, mükemmel taʿyînât ile Kapucubaşılık rütbesin ihrâz ve mahdûm-ı kāyim-makāmî Silahşorân-ı hâssaya iltihâk ile kesb-i imtiyâz ve Mektûbî hulefâsından ʿİsmet Efendi, Kāyim-makām-ı müşârun ileyhe Kâtib-i Dîvân ve dâhil-i silsiletü'z-zeheb-i hâcegân oldu. Vezîr-i esbak Mehmed Paşa mühürdârı olup, Hattî Efendi'nin hidmetinde nümâyâfte-i iştihâr olan ʿAbdulkerîm Efendi ve Yenişehirli İbrâhîm Efendi ve Başbâkī-kulu- zâde Ahmed Efendi, hâyiz-i rütbe-i hâcegânî ve nâyil-i mukaddime-i mekāsıd ü emânî oldular.