Pîrâye-bahş-ı mesned-i İftâ olan Dâmâd-zâde Feyzullah Efendi, bir müddetden berü o mesned-i refîʿde medâr-ı ʿakd ü hall-i umûr-i ʿulemâ ve mürettib-i hudûd ve merâtib-i verese-i enbiyâ olup, bu esnâda muktezây-ı hâl ile Meşîhat'den infisâl ve Beykoz'da vâkiʿ sâhil-hânesinde ikāmet ile devâm-ı ʿömr-i Pâdişâhî'ye iştigāl eyledi. Sadr-ı Rum ve hâvî-yi mantûk u mefhûm olan Dürrî-zâde Mustafa Efendi, iktisây-ı hilʿat-i beyzâ ile meʾmûr-i hidmet-i menîʿa-i Fetvâ olup, bu mülâbese ile münhal olan Rumeli Sadâreti, İmâm-ı Evvel-i Sultânî ve ʿilm ü hünerde evvel-i Teftâzânî ve sânî-yi Bedîʿ-i Hemedânî olan Pîrî-zâde ʿOsmân Monla Efendi'ye tevcîh ü ʿinâyet ve dûş-i istîhâlî ferve-i semmûr ile pür-zîb ü zînet kılındı.