Târîh-i mezkûrda Çukadar Ağa olan Gül Ahmed Paşa-zâde Feyzî Beyefendi, Kapucu-başılık ile ve Rikâbdâr Ağa, Cizye Muhâsebeciliği ile Enderûn-i hümâyûn'dan ihrâc olunup, Yûsuf Paşa-zâde İbrâhîm Bey, Çukadar Ağalık ile behre-ver ve ʿAlî Paşa-zâde Nuʿmân Bey, Rikâbdâr Ağalık ile muvakkar oldu. Feyzî Beyefendi'nin Silahdâr-ı Şehriyârî Mehmed Ağa ile bir mâddede muʿâraza vü münâkaşası zuhûr ve nefsâniyyet ile mîr-i mûmâ ileyhi nânpâresiz kurb-i Saltanat'dan mehcûr eylediği, bu Fakīr'e lisânen takrîr ve medd-i dûd-i âh ile tesvîd-i çehre-i çarh-i esîr eyler idi. Bir müddetden sonra Silahdâr Mehmed [M1 79] Paşa, Sivas Vâlîsi bulunup, mîr-i mûmâ ileyh bir me'mûriyyet ile Sivas'a vardıkda, şikâf-ı cerîha-i sadrını karîn-i iltiyâm ve yüz kîseden mütecâviz nakd ü cins ile ikrâm eylediği meşhûrdur.