Müşârun ileyh defʿa-i sâlise sadâretiyle Âsitâne-i saʿâdet'e gelüp, nâ-sâzkârî-yi zemân ve ʿadem-i muvâfakat-i gerdiş-i devrân ile ancak elli üç gün mesnedinde müstekarr olup, işbu şaʿbânu'l-muʿazzamın yedinci ahad günü zâyik-i merâret-i ʿazl ü infisâl ve Kızkullesi'ne habs ve bir gün sonra Magosa Kalʿası'na irsâl olundu. Yevm-i mezkûrda Defterdâr-ı Şıkk-ı Evvel Nâyilî ʿAbdullah Efendi huzûr-i hümâyûna daʿvet ve ilbâs-ı hilʿat-i zerrîn-tırâz-ı Sadâret ile lebrîz-i silâf-ı sâf-meserret oldu. Münhal olan Defterdârlık ile Rûznâmçe-i Evvel Behcet Efendi kâm-revâ ve Rûznâmecilik ile Yûsuf Efendi ve Defter Emâneti ile Halîl Efendi, hâyiz-i hubûr-i evfâ oldu. Sadr-ı sâbıkın Devlet Kethudâlığı'ıyla halka teslît eylediği Veliyyüddîn Efendi maʿzûl ve Yeğen Mehmed Ağa yerine mevsûl olup, Kethudây-ı sâbık dâyinlerini irzâdan sonra Resmo'ya iclâ olundu. Mûmâ ileyh ʿulûmun cemîʿîsinde mâhir ve cedel ü bahse kādir olup, ancak bed-zebân ve hâtır-şiken ve umûr-i hâriciyye maʿrifetinden ʿârî bir merd-i gayr-i mü'temen idi. Pîrî-zâde ʿOsmân Monla ile mülâkātında: “İsminiz nedir" su'âl, anlar dahi “Osmân'dır” dediklerinde, “Osmân ʿalâ vezn-i süʿbân” kelâmıyla merhûmu tekdîr etdikleri meşhûrdur. Gül Ahmed Paşa-zâde merhûm ʿAli Paşa, Mîrahûr-i Evvel iken cumʿalarda sâ'ir Rikâb ağalarıyla ziyâretine varup, zebânından dil-rîş-i elem olmamak zımnında yanına istiʿâze ile girüp, ʿakıbet: “Beyefendi mührünüze nazar edelim” demiş anlar dahi mühürlerini irâ'et eylediklerinde, “Mâşallah isminiz ʿAli imiş” demişler. Ve bundan garazları mîr-i mûmâ ileyhin mechûliyyet ve güm-nâmlığını işʿâr imiş. Anlar dahi fi'l-hâl telâfî-yi mâ-fâta ibtidâr ve: “Biz dahi mührünüzü ziyâret edelim” dedikde mührünü ʿarz edüp, baʿde'n-nazar “Sizin dahi isminiz Veli imiş” kelâmıyla mukābele edüp, intikām aldığını merhûmun lisânından bu Fakīr istimâʿ eyledim.