Gül Ahmed Paşa-zâde ʿAli Beyefendi'nin dâ'ire-i hümâyûna teʿalluk u irtibâtı hasebiyle terfîʿ-i kadr ü iʿtibârı matlûb-ı Şâhâne olup, mâh-ı mezkûr âhırında Mîrahûr-i Evvel vekâletiyle ve der-ʿakab asâletiyle dilşâd ve İbrâhîm Bey Kapucular Kethudâlığı'yla ber-murâd oldu. Târîh-i mezkûrda mahdûm-i Fetvâ-penâhî olan sâbıkā Galata Kadısı bâ-Pâye-i Edirne Bilâd-ı erbaʿa mevâlîsine lâhik ve Kevâkib-zâde'yi kazâ vü kader Mısr-ı Kāhire'ye sâ'ik olup, Kuds-i şerîf, Tabîb Mustafa Efendi'ye lâyık ve Galata Kazâsı, Arslanzâde Mustafa Efendi'ye muvâfık görüldü. Meşîhat-i İslâmiyye'de bulunan zevât-ı kirâmın evlâdlarına ber-vech-i iʿtidâl ikrâm ve hürmet ʿan-asl de'b-i saltanat olduğuna binâ'en, bu defʿa dahi mahdûm-i müşârun ileyhe Mekke-i mükerreme Pâyesi ihsân ve neyyir-i bahtı dirahşân kılındı. Bu evânda üç defʿa mahâll-i müteʿaddidede ihrâklar zuhûr edüp, ʿalevgîr-i iştiʿâl olmadan fazl-ı Hüdâ ile karîn-i hamûd ü intifâ oldu.