Bâlâda tahrîr olunduğu vech üzere Galata Serâyı'nda binâ olunan kitâbhâne hıtâm bulup, rutûbeti zâyil ve ʿadem-i teʾsîr-i belel muhâtarası hâsıl olup, fünûn-i müteʿaddideyi şâmil tertîb olunan kütüb-i nefîse, sene-i mezkûre muharreminin ikinci sebt günü sepedlere vazʿ olunup, sandallar ile Tophâne İskelesi'nden ihrâc olundukda, Galata Ağası mecmûʿ-i teberdârân ve zâbitân ile icrây-ı resm-i istikbâl ve kütüb-i mezkûreyi alay ile kitâbhâneye îsâl eylediler. Silahdâr-ı hazret-i Şehriyârî ʿAli Ağa ve Kitâb-hâne hocası Muhaddis Mehmed Efendi ve Üç Oda hocaları ve Şeyhu'l-kurrâsı ve Haremeyn Müfettişi ve mütevellî ve kâtibi ve derse taʿyîn olunun otuz nefer hulefâ ve Enderûn gılmânı ve bîrûn ve derûn-i kitâbhânede ictimâʿ ve tilâvet ile bedʾ olunan ʿaşr-ı Kur'ân-ı ʿazîmu'ş-şânı gûş-i cân ile istimâʿ akabinde, kitâbhâne hocası Tefsîr-i Beyzâvî'den Fâtiha-i şerîfe tefsîrine başlayup, neşr-i dürer-i meʿânî ve keşf-i esrâr-ı mesânî edüp, duʿâya âgāz ve sâhibü'l-hayrâta dergāh-ı ulûhiyyetden meded ü tevfîk niyâz eyledi. Kitâbhânenin yemîn ü yesârında olan çeşme-sârın lülelerinden icrâ olunan şerbet-i sükker ile hâss u ʿâmm şîrîn-kâm varup ve erbâb-ı vezâyife ber-vech-i pîşîn muharrem aylığı verilüp, cümlesi duʿây-ı bekā-yı ʿömr-i Şehinşâhî'yi zebân-güzâr-ı devâm eylediler.