Zilhiccetü'ş-şerîfenin onuncu cumʿaertesi gicesi neyl-i şeref-i muʿâyede zımnında aʿyân-ı devlet ve erkân-ı [M1 37] saltanat Serây-ı hümâyûn'da sû-be-sû ‘akd-i encümen-i cemʿiyyet edüp, zuhûr-i tebâşîr-i sabâhda Şehriyâr-ı bergüzîde-âsâr mânend-i mühr-i tâbdâr, taht-ı fîrûze-bahta ifâza-i envâr edüp, dağdâr-ı hasret talʿatleri olan bendegân-ı nevbet ve rütbelerine riʿâyet eyleyerek takbîl-i dâmen ü âstîn-i Tâcdârî'leriyle kesb-i şeref ü şân eylediler. Baʿde'l-muʿâyede resm-i saltanat-ı dîrîn üzere Hidîv-i pür-temkîn hîre-sâz-ı mülûk-i pîşîn olan tantana-i Hüsrevâne'leriyle Sultân Ahmed Câmiʿinde salât-ı 'îdi edâdan sonra ‘azm-i serây-ı bî-hemtâ ve icrây-ı resm-i dahâyâ buyurdular.