Hâlâ Gümrük Emîni İshak Ağa'nın Beykoz'da vâkiʿ bağçesi, demîdegâh-ı sünbül ü nesrîn ve kasr-ı dil-nişîni nümûne-nümây-ı nigâr-hâne-yi çîn olduğuna binâʾen, kesb-i neşât ve celb-i inbisât dâʿiyesiyle Emîn-i mûmâ ileyh tarafından kemterâne daʿvet ve Pâdişâhâne icâbet olunmuşidi. Şehr-i mezkûrun onuncu günü Beşiktaş'dan şevket ü übbehetle hareket ve kasr-ı mezkûru makdem-i hümâyûnlarıyle reşk-sâz-ı gurfe-i cennet buyurup, sunʿ-i Hüdâvendî-yi bî-misl ü mânende nigeh-endâz-ı seyr ü temâşâ ve nezâret ve letâfet-i ezhâr u çemenzâr ile gonçe-i tabîʿat-i hümâyûnları mutarrâ olup, baʿde tenâvüli't-taʿâm masîf-i Şâhâne'lerine sâye-endâz-ı ʿizz ü ihtişâm oldular.