Mâh-ı mezkûrun on altıncı çehârşenbin günü, Sadr-ı vâlâ-menkabet kemâl-i tazarruʿ u istikānetle Pâdişâh-ı Behrâm-savleti daʿvet ve Dolma-bağçe'de tertîb-i çeşn ü ziyâfet edüp, daʿvet-i müşârun ileyhe icâbet-i bende-perverlik ve kerem-güsterlik şîme- sine riʿâyet kabîlinden olduğuna binâʾen, zikr olunan hadîka-i enîkayı kudûm-i Şâhâneleri'yle huld-i berîne reşk-sâz ve fi'l-hâl Sadrıaʿzam hazretleri resm-i istikbâl icrâsiyle semm-i semend-i iclâllerine ferş-rûy-i niyâz eyleyüp, hûbî-sâz ve hûbî-âvâz: Mey ber dehr-i yekî bih tenha-dil Çün şeved her dü cemʿ der yek-câ Kâr-ı sahib-dilân şeved müşkil mâ-sadakı üzere sâzendegân ü hânendegân terâne-i sâz ve usûl-i âvâz ile tâk-ı mukarnas-ı feleke velvele-endâz olarak tehyîc-i şevk u garâm ve tahrîk-i sâkin-i vecd ü hiyâm eyledikleri ʿakîbinde cânbâzlar dehşet-resân-ı ʿukūl olacak sûretde evzâʿ-ı garîbe icrâ ve seyr ü temâşâ içün ictimâʿ edenleri deryâ-yı hayrete ilkā eyledikleri hâlde, keştgîrlere ruhsat ve anlar dahi icrây-ı sanʿat ve birbirini garîm-i deyn gibi sürüyüp, gark-ı ʿarak taʿb ü zucrat eylediler. Baʿdehû ferş-hân ve tenâvül-i etʿime-i mütenevviʿatü'l-elvân maslahatı dahi gāyete resân olup, taraf-ı Sadrıaʿzamî'den birkaç re's esb-i müzeyyen [M1 20] ve birkaç boğça akmişe-i Güçerât ve paten ʿarz-ı huzûr-i Şehriyâr-ı zü'l-minen kılınup, Sadrıaʿzam hazretlerine bol yenlü bir sevb-i semmûr ile iltifât ve hademe-i sâ'ireyi nukūd-i nâ-maʿdûd ile hâ'iz-i rehîne-i meserret buyurup, Beşiktaş'a pây-endâz-ı ikbâl ve o Sâhil-serây-ı bihişt-âsâya sâye-bahş-i iclâl oldular.