Bir müddetden berü Çavuş-başı olup, fi'l-asl maskat-ı re's olan Bosna'da vukūʿ bulan ihtilâle nizâm vermek üzere ʿunvân-ı mezkûr ile o cânibe me'mûr olan Mehmed Ağa, rızây-ı devlete muvâfık harekâta mazhar ve Bosna taraflarında olan ihtilâlâtı defʿ ile şâyân-ı nazar-ı iksîr-eser olup, işbu saferu'l-hayrın üçüncü günü rütbe-i Mîr-i mîrânî'ye ısʿâd ve Bosna Eyâleti ile manzûme-i ikbâli müstezâd kılındı. Münhal olan Çavuş-başılık ile Dergâh-ı ʿâlî kapucu-başılarından olup, hâlâ Sipâh Ağası Aydın Mu- hassılı 'Abdullah Paşa-zâde el-Hâc 'Abdullatif Bey mâh-ı mezkûrun yirmi altıncı günü mükerrem ve Sipâh Ağalığı'yle Kapucular Kethudâsı vekîli Ser-bostâniyân-ı sâbık el-Hâc Hüseyin Ağa'nın dâyire-i ihtişâmı muntazam oldu. Yevm-i mezkûrda Darb-hâne Emâneti mutasarrıfı 'Abdullah Efendi'ye ve Matbah-ı 'Âmire Emâneti, mutasarrıfı Mehmed Emîn Ağa-zâde Hüseyin Ağa'ya ve Gümrük Emâneti, es-Seyyid İshak Ağa'ya ve Masraf-ı Şehriyârî Kitâbeti, mutasarrıfı İbrâhîm Efendi'ye ibkā ve dağdağa-i 'azl-i nâ-be-hengâmdan cümlesi vâreste vü rehâ kılındı.